Snudde Manchester-derbyet på tampen: – Ein enorm augneblink

To seine mål sørga for at Manchester United tok alle tre poenga i søndagens byderby borte mot Manchester City.

Fem minutt før slutt fekk Manchester United straffe då Amad Diallo vart felt. Bruno Fernandes sette ballen sikkert i mål.

I det 90. minutt ordna Diallo sjølv 2–1 på lekkert vis.

– Ein enorm augneblink for Ruben Amorim, sa Viaplay-ekspert Tor Ole Skullerud.

Det såg lenge ut som alle poenga skulle bli igjen i den lyseblå delen av byen.

Josko Gvardiol sende heimelaget i leiinga etter 36 minutt. Han heada ballen presist i mål etter eit innlegg frå Kevin De Bruyne. Phil Foden kunne ha dobla leiinga før pause, men United-keeper André Onana redda fint.

Manchester United skapte fint lite før pause, men kom til store sjansar både ved Bruno Fernandes og Amad Diallo utover i 2. omgang.

Og på tampen vart det altså Fernandes og Diallo som scora dei avgjerande måla.

Erling Braut Haaland spelte heile kampen for City, utan å få til spesielt mykje.

Begge Manchester-laga har vore i svak form den siste tida.

Før oppgjeret hadde Manchester City berre vunne éin av sine ti siste kampar – alle turneringar inkludert.

Manchester United har vunne to av to kampar i Europaligaen etter at Ruben Amorim tok over. I serien hadde United under Amorim fire poeng på fire kampar – før søndagens byderby.