د هند د کلاسیکې موسیقۍ مشهوره طبله ږغوونکی ذاکر حسین مړ شو
د هند صدراعظم نریندرا مودي لیکلي، چې د طبلو افسانوي ماسټر ذاکر حسین د مړینې له کبله خپه دی. د هغه په وینا ذاکر حسین د هند د کلاسیکې موسیقۍ په نړۍ کې انقلاب راوستلی و.
د ذاکر حسین کورنۍ په یوه اعلامیه کې ویلي، هغه پرون یکشنبه د ۷۳ کلونو په عمر د امریکا د سن فرانسیسکو په یوه روغتون کې له دې نړۍ سترګې پټې کړې.
هغه له څه مودې د سږو سخته ناروغي درلوده. ذاکر حسین د نورو جایزو تر څنګ په ۲۰۲۳م کال کې پدما وبهوشن غیرپوځي جایزه ګټلې وه، چې په هند کې د اعتبار له مخې دویمه درجه معتبره جایزه ده.