სიიარტო: ბუდაპეშტმა ევროკავშირის სანქციებიდან ამოაღებინა პატრიარქი კირილე და რუსეთის ოლიმპიური კომიტეტი
ეს არ არის პირველი შემთხვევა, როდესაც უნგრეთი ეწინააღმდეგება პატრიარქ კირილეს წინააღმდეგ სანქციების შემოღებას. 2022 წელს უნგრეთმა ორჯერ დაბლოკა რუსეთის მართლმადიდებელი ეკლესიის მეთაურის წინააღმდეგ სანქციების დაწესება. ბუდაპეშტი ამტკიცებდა, რომ სანქციების სიაში არცერთი რელიგიური ლიდერი არ უნდა იყოს შეყვანილი.
პატრიარქმა კირილემ არაერთხელ დაუჭირა მხარი უკრაინაში რუსეთის აგრესიას და ინტერნეტით 20-წუთიანი ლექციაც ჩაუტარა პაპ ფრანცისკეს, რის შემდეგაც კათოლიკური ეკლესიის წინამძღვარმა კირილეს მოუწოდა, არ დაეშვას „პუტინის საკურთხევლის მსახურის“ დონეზე. რუსეთის მართლმადიდებელი ეკლესიის მეთაურმა, კერძოდ, თქვა, რომ დონბასში „მეტაფიზიკური ბრძოლა“ მიმდინარეობს და ამტკიცებდა, რომ რუსეთი თავისი ისტორიის მანძილზე არავის დასხმია თავს. ის შეყვანილია დიდი ბრიტანეთის, კანადისა და ჩეხეთის სანქციების სიებში. ესტონეთმა და ლიეტუვამ აკრძალეს თავიანთ ტერიტორიებზე კირილეს შესვლა.
2023 წელს საერთაშორისო ოლიმპიურმა კომიტეტმა (IOC) უკუაგდო რუსეთის ოლიმპიური კომიტეტი (ROC) რუსეთის ფედერაციის მიერ ანექსირებული უკრაინის ტერიტორიების - დონეცკის, ლუგანსკის, ხერსონისა და ზაპოროჟიეს ოლქების - სპორტული ორგანიზაციების საკუთარ შემადგენლობაში შეყვანის გამო.
რუსეთის ოლიმპიურ კომიტეტს არა აქვს უფლება, იმოქმედოს როგორც ეროვნულმა ოლიმპიურმა კომიტეტმა ან მიიღოს დაფინანსება საერთაშორისო ოლიმპიური მოძრაობისგან. IOC-მ ასევე დაიტოვა უფლება, მიიღოს გადაწყვეტილებები ოლიმპიურ თამაშებზე რუსი სპორტსმენების ნეიტრალურ რანგში მონაწილეობის შესახებ.
უნგრეთი ბრიუსელში რეგულარულად ბლოკავს პროუკრაინულ ინიციატივებს. 2023 წლის დეკემბერში ბუდაპეშტმა დაბლოკა უკრაინისთვის განკუთვნილი 50 მილიარდი ევროს დახმარება ევროპის ქვეყნებიდან, მაგრამ მოგვიანებით დათანხმდა კიევისთვის დახმარების გამოყოფას. 2024 წლის ზაფხულში, ვიქტორ ორბანის მოსკოვში ვიზიტის შემდეგ, უნგრეთმა რუსეთისა და ბელარუსის მოქალაქეები „ეროვნული ბარათის“ პროგრამაში შეიყვანა. ის უნგრეთში ორი წლის განმავლობაში მუშაობის საშუალებას იძლევა და შესაძლოა გაგრძელებულ იქნეს. ბრიუსელში განაცხადეს, რომ ეს ნაბიჯი ზრდის რუსეთის ფედერაციის მხრიდან ევროპის ქვეყნებში ჯაშუშობის საფრთხეს.