طالبانو په پروان ولایت کې پنځه کسان په درو وهلي دي
د طالبانو سترې محکمې نن (د لیندۍ ۲۷مه) په یو بیان کې وویل چې دا کسان د زنا او نامشروع اړیکو په تور هر یو له ۳۰ نیولې تر ۳۹ درو پورې په تعزیري سزا او د شپږو او دریو کلونو ترمنځ د حبس په بېلابېلو دورو محکوم شوي دي.
د طالبانو سترې محکمې پرون هم خبر ورکړ چې په سمنګان ولایت کې ۴ کسان په عام محضر کې په درو وهل شوي دي. طالبانو پر افغانستان له واکمنېدو وروسته په تېرو څه باندې دریو کلونو کې لسګونه کسان په بېلابېلو تورونو، په عام محضر کې په درو وهلي او پر ځینو نورو یې قصاص تطبیق کړی دی.
د بشري حقونو ډلو له طالبانو بیا بیا غوښتي دي چې په عام محضر کې خلکو ته د بدني سزاګانو له ورکولو ډډه وکړي.