Шымкенттегі өрттен бір әйел қаза болып, үш адам зардап шекті

Шымкенттегі "Жайлау" ықшам ауданындағы жеке үйде болған өрт салдарынан 51 жастағы әйел мерт болып, оның ұлы мен келіні және немересі ауруханаға түсті.


Қалалық төтенше жағдайдар департаментінің дерегінше, 17 желтоқсан күні таңертең екі қабатты үйдің бірінші қабаты өртенген. Құтқарушылар бір сағатта өртті сөндіріп, үй ішінен өлген әйелді тапқан.


Полиция бұл оқиғаға байланысты қылмыстық іс қозғалғанын айтып, тергеу амалдарына байланысты өзге ақпарат жария етуге жатпайды деп хабарлады.


Журналист Михаил Козачков телеграм-арнасында бұл оқиғаға байланысты Қылмыстық кодекстің "Бөтеннің мүлкін қасақана жою немесе бүлдiру" және "Адам өлтіру" бабы бойынша іс қозғалды деп жазды. Бұдан бөлек, әлдебір құжат скринін бөлісті. Онда марқұм әйел газдан уланып қаза болған деп жазылған.


Козачковтың мәліметінше, марқұм – Түркістан облыстық мамандандырылған тергеу соты төрағасының бұрынғы әйелі. Өрт болған үйдің ауласынан керосин құйылған 5 литрлік екі пластмасса ыдыс және 10 литрлік канистр табылған.


Марқұмның жақындары оқиғаға байланысты қазір қандай да бір пікір бере алмайтынын айтты.