“Ең үздік олимпиадалық команда - 2024”: түркістандық оқушылар республикалық ауыл мектептеріне арналған олимпиадада үздік нәтиже көрсетті
Астанада ауыл мектептерінің оқушылары арасында жаратылыстану-математикалық бағыт бойынша өткен Республикалық олимпиаданың қорытындысы шығарылды. Олимпиаданың соңғы кезеңіне облысымыздан 41 оқушы қатысып, оның ішінде 23 оқушы жеңімпаз атанды.
Түркістан облысының қоржыныны 7 алтын, 4 күміс, 12 қола медальмен толықты. Бұл балалар – өңіріміздің ең шалғай аймақтарынан келген дарынды жастар. Жалпы есепте Республикалық олимпиадада Түркістан облысының оқушыларына “Ең үздік олимпиадалық команда - 2024” атағы берілді.
Оқу-ағарту министрі Ғани Бектайұлы Бейсембаевтың тікелей тапсырмасымен ауыл мектептерінің талантты және білімге құштар оқушыларын анықтау мақсатында республикалық олимпиада екінші жыл қатарынан ұйымдастырылып отыр. Олимпиаданың бірінші облыстық кезеңіне 900-ге жуық оқушы қатысып, олардың 71-і олимпиаданың Республикалық кезеңіне жолдама алған. Оның ішінде 41 оқушы жаратылыстану-математикалық бағыт, 30 оқушы гуманитарлық бағыт бойынша республикалық кезеңге өтті. Бұл ауыл оқушыларының интеллектуалдық жарыстарға деген қызығушылығының артып, республикалық олимпиаданың мәртебесінің жоғары екенін көрсетеді.
Ал ауыл мектептерінің оқушылары арасында қоғамдық-гуманитарлық бағыт бойынша өткен республикалық олимпиаданың соңғы кезеңіне облысымыздан 30 оқушы қатысып, оның ішінде 25 оқушы жеңімпаз атанды. Түркістан облысының қоржыны 3 алтын, 9 күміс, 9 қола медальмен толықты.
Сондай-ақ, 4 оқушымыз олимпиаданың Мақтау қағазына ие болды. Жалпы командалық есеп бойынша, қоғамдық-гуманитарлық бағыттағы республикалық олимпиадада Түркістан облысының ауыл мектептері оқушылары жүлделі ІІ орынды алды.
Суреттер: Түркістан облысы әкімінің баспасөз қызметі
Ауыл мектептерінде жүріп өз білімін Республикада жоғары екенін көрсеткен барлық үздік оқушыларымызға алғыс білдіреміз!!!