Өкілдер палатасы үкіметті уақытша қаржыландыру туралы заң жобасын кері қайтарды
Құжатты Трамп қолдаса да мемлекет шығынына қатысты қатаң көзқарас ұстанатын ондаған республикашыл оған қарсы болды деп жазды "Америка дауысы" сайты.
Федералдық агенттіктерді қаржыландыру 20 желтоқсанда аяқталады, демалыс күндері түрлі қызметтің жұмысы тоқтауы мүмкін. Бұл 2018 жылдың желтоқсанынан бергі алғашқы шатдаун болуы ықтимал. Ол кезде шатдаун 34 күнге созылған еді.
Аталған заң жобасы бейсенбі күндіз таныстырылған. Құжат үкіметті қаржыландыруды 14 наурызға дейін қазіргідей деңгейде қалдыруды, Трамп президенттігінің алғашқы екі жылында мемлекет қарызының шегін белгілемеуді, табиғи апаттың салдарын жоюға шамамен 100 млрд доллар бөлуді, фермерлерге экономикалық көмек ретінде шамамен 10 млрд доллар қаражат бөлуді қарастырады.
АҚШ-тың қайта сайланған президенті Дональд Трамп пакетті бірден қолдап, "Америка халқы үшін өте тиімді келісім" деп атаған еді.
Бейсенбі күнгі дауыс беру кезінде құжатты 174 конгресмен қолдап, 235-і қарсы шықты, біреуі қалыс қалды. Демократтар жетекшісі Хаким Джеффрис заң жобасын "ісі күлерлік" құжат деп атаған. Осылайша құжат қабылданбай қалды.
Құжат ірі екі партиялық пакеттің орнына ұсынылған еді. Соңғы аталған құжатқа Трамп пен ол үкіметтің тиімділігі жөніндегі жаңа департаментіне жетекші ретінде ұсынған Илон Маск қарсы болған еді.
Үкімет сенбіге қараған түні-ақ өзінің міндеттерінің бірқатар бөлігін орындай алмай қалады, шамамен 875 мың қызметкер ақысыз демалысқа жіберілуі мүмкін деп жазды сайт.
Джо Байденнің баспасөз хатшысы Карин Жан-Пьер қазіргі президент "үкіметтің жұмысын сақтап қалу үшін екіпартиялық келісімді қолдайды, бірақ ол республикашылдар соңғы сәтте қабылдауды ұсынған миллиардерлерге сыйлық емес еді" деді.