خیبرپښتونخوا کې چارواکي: د فرقوي شخړو د مخینوي په موخه له عام خلکو درنې وسلې ټولوو
د رویټرز خبري اژانس د راپور له مخې، په کورمه اجنسۍ کې قبایلو ویلي، خپلې وسلې به تسلیم نه کړي.
پر دغه ساحه چې د اوسېدونکو شمېر یې شا و خوا ۶۰۰زره کسانو ته رسېږي، فډرال او ایالتي چارواکي په دودیز ډول محدود کنټرول لري او له لسیزو راهیسې په کې فرقوي شخړې کېږي.
تازه شخړې تېره میاشت د سنیانو او شیعه ګانو ترمنځ وشوې، چې د راپورونو له مخې د سخت بشري بحران سبب شوې.
د هغې لویې لارې د تړل کېدو له کبله چې د کورمې عمده ښار پاړه چنار له پېښور سره وصلوي، په دې ساحه کې د لوږې، د درملو د نشتوالي او روغتونونو کې د اکسیجن د کموالي راپورونه ورکړل شوي دي.