Рөстәм Миңнеханов кимендә 50 номерлы яңа кунакханәләр өчен салым ташламаларын раслады

Татарстан Рәисе Рөстәм Миңнеханов кимендә 3 йолдызлы һәм 50 номерлы яңа кунакханәләр өчен милеккә салым буенча ташламалар кертү турында закон имзалады.

Документ объектны файдалануга тапшырган көннән башлап ун елга 0,1 процент күләмендә ташламалы салым ставкасын билгеләүне күздә тота. Ул 2024 елның 1 гыйнварыннан 2026 елның 31 декабренә кадәр ачылган кунакханәләргә кагыла.

Үзгәрешләр Татарстан Республикасының «Оешмалар милкенә салым турында»гы законының 3нче маддәсенә кертелде. Закон проектын Татарстан Дәүләт Советы 23 декабрьдә узган утырышта кабул итте.

Закон проекты турында фикер алышу барышында ТР икътисад министры Мидхәт Шаһиәхмәтов документ кунакханә бизнесын стимуллаштыру һәм республикада номерлар фондын арттыру өчен булдырылу турында сөйләде. Азагына якынлашып килүче 2024 елда мондый ташлама өч кунакханәгә бирелде.