Кукмарада район башлыгының Чыршы бәйрәме булды
Кукмара Мәдәният йортында балалар өчен район башлыгының Чыршы бәйрәме үткәрелде. Бу хаакта «Хезмәт даны» сайтында Ризилә Корбанова яза.
Быел анда уку алдынгылары, спорт, мәдәният һәм башка өлкәләрдә уңышларга ирешкән укучылар, махсус хәрби операциядә катнашучыларның, хәрби хәрәкәт ветераннарының балалары чакырылган иде. Район мәгариф идарәсе җитәкчесе Илфат Әхмәдуллинның сүзләре буенча чарада 3 яшьтән алып 17 яшькә кадәрле 400 бала катнашты.
Балаларны район башлыгы Сергей Димитриев котлады һәм үзенең изге теләкләрен ирештерде.
«Без районда сыйфатлы белем һәм тәрбия алу өчен бөтен шартларны да тудырырга һәм балалар киләчәктә үз юлларын таба, югары уку йортлары, техникумнарга керә алсыннар, илебезгә кирәкле, файдалы кешеләр булып үссеннәр өчен тырышабыз. Шулай ук әти-әниләргә, педагог, укытучыларга да бик зур рәхмәт. Ике арада аңлашу булмаса, эшнең нәтиҗәсе дә күренмәс иде. Без бердәм булуыбыз белән горурланабыз. Сез төрле ярышларда, конкурсларда район данын яклыйсыз. Барыгызны да якынлашып килүче Яңа ел бәйрәме белән котлыйм. Саулык-сәламәтлек, бәхет-шатлык, гаиләләрегезгә иминлек телим», — диде Сергей Дмитриев.