Қорақалпоғистонда Тез тиббий ёрдам ходимлари калтакланди

Бир муддат олдин ижтимоий тармоқларда Қорақалпоғистон Тез тиббий ёрдам ходими калтаклангани акс этган видео тарқалган эди. Мазкур ҳолат юзасидан Қорақалпоғистон Республикаси ССВ Ахборот хизмати расмий муносабат билдирди.

Маълум қилинишича, Амударё тумани Тез тиббий ёрдам бўлимига соат 19:40 да ушбу туманнинг «Қиличбой» МФЙда яшовчи 1997 йилда туғилган К.Р. исмли (аёл) фуқаро бўйича чақирув келиб тушган.

Чақирувга асосан, шифокор С.П. ва фельдшер Б.Ж. ҳайдовчи М.Ҳ. бошқарувидаги махсус автомашинада чақирилган манзилга 8 дақиқа 30 сонияда етиб борган.

Тез тиббий ёрдам ходимлари беморни текширувдан ўтказиб, унга зарур тиббий ёрдам кўрсатган. Шу вақтда бемор маст ҳолатдаги қайнотасига хонадан чиқиб туришни илтимос қилган ва қайнотаси хонадан агрессив ҳолатда чиқиб кетган.

Ходимлар беморга керакли ёрдамни кўрсатиб бўлиб, ташқарига чиқаётган пайтда, беморнинг қайнотаси шифокор ва фельдшерга ҳужум қилиб, танасининг юзи ва бўйнига енгил тан жароҳати етказган. Шунингдек, уларни таҳқирлаб, ҳақоратли сўзларни айтган.

Мазкур ҳолат юзасидан тиббий ходимларга куч ишлатган шахс ИИБ ходимлари томонидан олиб кетилган.

Тан жароҳати олган ходимлар эса Амударё туман тиббиёт бирлашмасининг травматология пунктида кўрикдан ўтказилган.