Тунги барни реклама қилиш учун қизларни кетига урган йигитга қандай чора кўрилди?
0
Хабар берилганидек, 25 декабрь куни Escada lounge bar ўз Instagram аккаунтида Янги йил шоуларини реклама қилувчи видео эълон қилди. Видеодаги йигит орқаси билан турган етти нафар қизнинг кети ва оёқларига уриб, ҳар бир зарбада санани айтади: «25, 26, 27, 28, 29, 30, 31 декабрь — ҳар куни».
«Катта янги йил шоуси», «кириш бепул», «келиб, бемалол дам олишингиз мумкин», — дейди йигит қизларга ишора қилиб. Кадр ортидан овоз: «Нега қизларни қарсиллатдинг (урдинг)?» деб сўрайди. «Сен қилмаганингдан кейин мен қиламан-да!» — деб жавоб беради йигит.
Видеога «Газетa.uz»нинг эътиборини қаратган тошкентлик Евгения М. Чилонзор тумани ИИБга «Хотин-қизларни тазйиқ ва зўравонликдан ҳимоя қилиш тўғрисида»ги ҳамда «Хотин-қизлар ва эркаклар учун тенг ҳуқуқ ҳамда имкониятлар кафолатлари тўғрисида»ги қонунлар бузилгани юзасидан рекламани текширишни сўраб, ариза ёзганини маълум қилди.
У аризада Ўзбекистон БМТнинг Хотин-қизларни камситишининг барча шаклларига барҳам бериш тўғрисида конвенциясига аъзо сифатида бундай чиқишларни қоралашини ва барча мақбул воситалар билан хотин-қизларни камситишга барҳам бериш сиёсатини амалга ошириш мажбуриятини олганини эслатади.
Аёлнинг сўзларига кўра, бар рекламаси «аёлларга нисбатан ҳурматсизлик акс этган истеъмолчилик муносабатини тарғиб қилади».
«Аёл шаъни ва қадр-қимматини камситувчи видеолавҳаларни суратга олиш ва тарқатишга йўл қўйиб бўлмайди, деб ҳисоблайман. Жамиятимизда аёллар аллақачон иккинчи даражали одам ҳисобланади. Барнинг материал том маънода аёлларнинг жинсий эксплуатациясини тарғиб қилади. Уларда тирик қизлар буюм — гўшт бўлаклари ёки ўйинчоқлар сифатида кўрсатилган», — деди Евгения.
Суд мажлисида Ш. Юнусов ўз айбига иқрор бўлиб, ўша куни номаълум қизларга нисбатан кўрсатилган ҳаракатларни содир этганини тасдиқлаб, «клуб маъмуриятидан ҳеч қандай моддий фойда олмаганини» қўшимча қилди. У ўз қилмиши қандай оқибатларга олиб келишини тушунганини айтди ва судни бундай ҳолат бошқа такрорланмаслигига ишонтирди.
Суд Маъмурий жавобгарлик тўғрисидаги кодекснинг 183-моддаси (Майда безорилик) бўйича 5 сутка маъмурий қамоқ жазоси тайинлади, шу билан бирга, уни махсус ҳибсхонада сақлаш харажатларидан озод қилди.
Қарорда қайд этилишича, ҳуқуқбузар ўз хатти-ҳаракати билан жамиятда ўрнатилган хулқ-атвор қоидаларига атайлаб менсимаслик кайфиятини кўрсатган.
Суд қарорида бар маъмуриятига нисбатан ҳеч қандай жазо назарда тутилмаган. Унда йигит ушбу барда ишлаши ёки йўқлигига ҳам аниқлик киритилмаган.