Ўзбекистонда қарздорлар учун мажбуриятлар реестри жорий этилади
0
Амалдаги қонунчиликка кўра, агар қарздорнинг мол-мулки ёки даромади ундириш учун етарли бўлмаса, ижро иши якунланган деб ҳисобланади ва чекловлар бекор қилинади. Янги қонун лойиҳаси эса, қарздорнинг мажбуриятларини тўлиқ бажаришига қадар чекловларни кучда қолдиришни назарда тутади.
Реестр Мажбурий ижро бюроси томонидан юритилади ва унга қарздорнинг мол-мулкка эга эмаслиги ёки маблағлари йўқлиги ҳақидаги маълумотлар киритилади. Шунингдек, реестрга киритилган қарздорлар учун солиқ қарзига пеня ундирилмаслиги Солиқ кодексида кўзда тутилган.
Барча чекловлар, масалан, мол-мулкни хатлаш, чет элга чиқишни тақиқлаш ёки ҳисобварақларни блоклаш, қарздор ўз мажбуриятларини тўлиқ бажармагунга қадар ўз кучида қолади. Агар кейинчалик қарздорнинг маблағлари ёки мол-мулки аниқланса, мажбурий ижро ҳаракатлари қайта тикланади.
Қонунга кўра, қарздор реестрдан фақат қуйидаги ҳолатларда чиқарилади: қарздор мажбуриятларини тўлиқ бажарганда, вафот этганда, суд ҳужжати ҳақиқий эмас деб топилганда ёки 10 йил давомида қарздорнинг мол-мулки аниқланмаса. Шунингдек, қарздор банкрот деб эълон қилинганда реестрдан чиқарилади.
Қонун лойиҳаси биринчи ўқишда қабул қилинди, олдинда иккинчи ва учинчи ўқиш жараёнлари бор. Депутатлардан 138 нафари лойиҳани қўллаб овоз берди, 2 нафари бетараф қолди.