Нодирбек Абдусатторов дунёнинг энг кўп даромад оладиган шахматчилари қаторида

Халқаро шахмат федерацияси (ФИДE) 2024 йилда энг катта мукофот пули ютиб олган шахматчилар рўйхатини эълон қилди. Ушбу рейтингга ўзбекистонлик гроссмейстер Нодирбек Абдусатторов ҳам кирди.

Рейтингнинг биринчи поғонасида 2024 йил классик шахмат бўйича жаҳон чемпиони ҳиндистонлик Гукеш Доммаражу жой олди, у йил давомида 1 577 842 доллар ишлаб топган. Иккинчи ўринни Хитой гроссмейстери Дин Лижен 1 183 600 доллар билан эгаллади. Норвегиялик Магнус Карлсен эса 639 369 доллар даромад билан учинчи ўринда.

Нодирбек Абдусатторов 12-ўринни эгаллаб, йил давомида 132 981 доллар ишлаб топди. Ушбу натижа унга 2024 йилда 12 та нуфузли турнирда қатнашиш орқали эришилди.

2025 йилнинг бошланиши ҳам Абдусатторов учун сермаҳсул бўлиши кутилмоқда. У 17 январь куни Нидерландиянинг Вейк-ан-Зеэ шаҳрида ўтказиладиган "Тата Стеэл Чесс-2025" турнирида иштирок этади.