Актёр Леонардо Ди Каприо иккиюзламачиликда айбланмоқда

^{Фото: Getty Images}
Актёр Леонардо Ди Каприо ва унинг қаллиғи Витториа Черетти хусусий самолётда Мексикага етиб келганида аэропортда папараццига тушиб қолди. Бу ҳақда “Кино.маил.ру”га таяниб Дарё хабар бермоқда.

Мексика аэропортида Ди Каприо ва Череттидан ташқари актёрнинг отаси Жорж ва унинг аёли бўлган. Актёр ўша кун кўзга ташланмайдиган спорт кийимида ва қора кўзойнакда бўлган.

Жорий йил 7 январь куни Лос Анжелесда бошланган ўрмон ёнғинлари жиддий талафотларга олиб келаётган ҳамда 100 мингдан ортиқ аҳолини эвакуация қилишга мажбур бўлган вақтда Ди Каприо АҚШни тарк этишга қарор қилган ва Мексиканинг Кабо Сан Лукас шаҳрига яқинлари билан учиб кетган.

^{Фото: Daily Mail}
“Леонинг экологияга қўшган ҳиссаси ва ҳаракатларини эътиборга оладиган бўлсак, бундай йирик табиий офат пайтида унинг шахсий самолётдан фойдаланиши ҳайратланарлидир”, дейилади хабарда.

Маълумот учун, 1998 йилда “Титаник” фильмини суратга олиш ишлари тугаганидан сўнг, Леонардо Ди Каприо иқлимга оид экологик фалокатларнинг олдини олиш масалалари билан шуғулланадиган мутахассисларни жалб қилган ва ўзининг Global Green фондини ташкил қилган. Жамғарма ёввойи табиат, денгиз флора ва фаунаси ҳамда қўриқланадиган ерлардаги маҳаллий аҳоли ҳуқуқларини ҳимоя қилиш бўйича лойиҳаларни молиялаштиради.

^{Фото: Daily Mail}
2021 йилда ребрендингдан сўнг жамғарма Rе:wild деган номга ўзгартирилган ва Global Wildlife Conservation билан бирлашган. Rе:wild 50 та давлатда фаолият юритади, 120 га яқин турли лойиҳаларни қўллаб-қувватлайди ва 60 дан ортиқ компаниялар билан ҳамкорлик қилади. Шунингдек, 2022 йилда Ди Каприо халқаро иқлим фондига 45 миллион доллар маблағ ажратган.

Шунингдек, актёр 20 йилдан ортиқ вақт давомида 200 дан ортиқ турли хил экологик лойиҳаларни молиялаштирган, иқлим ўзгариши ва глобал иссиқликка қарши курашиш учун 80 миллион доллардан ортиқ грант ажратган.

Daily Mail нашри қайд этишича, америкалик актёр ва сценарий муаллифи Ларри Девид ҳам Мексикага тахминан ўша вақтда етиб келган.