Қазақстанда коммуналдық қызметтер тарифі тағы өседі

Қазақстанда коммуналдық қызмет тарифтері өседі. Бұл туралы ұлттық экономика вице-министрі Арман Қасенов мәлімдеді, - деп хабарлайды Tengrinews.kz тілшісі.
Оның айтуынша, тарифтердің өсімі "минималды" болады.

"Тарифтердің минималды өсуі жүзеге асырылады (...) Бұл болжам емес, бұл талдау негізінде жасалған есептеулер. Біз тарифтердің қанша пайызға өсетінін білеміз және бұл өсім ең минималды болатынына сендіреміз", – деді Арман Қасенов үкіметтегі брифингте.

Вице-министр нақты сандарды атаған жоқ: оның айтуынша, әр табиғи монополия субъектісінде бұл көрсеткіштер әртүрлі.

"Инфляциялық себетте бірнеше жүздеген өнім бар, сәйкесінше, әр элементтің ықпалы минималды. Әрине, теміржол тарифтері, жанар-жағармай бойынша кез келген шешім қабылдамас бұрын, барлық осы әсерлер есептеледі. Егер әсері (инфляцияның – еск.) белгілі бір шектен жоғары болатынын көретін болсақ, әрине, тарифтердің өсуін шектейміз", – деп толықтырды Қасенов.

Сілтемесіз жаңалық оқисыз ба? Онда Telegram желісінде парақшамызға тіркеліңіз!