Песошин: Ленинград оборонасы - Бөек Ватан сугышының иң фаҗигале сәхифәләренең берсе
Татарстан Республикасы Премьер-министры Алексей Песошин Ленинградны фашистлар блокадасыннан тулысынча азат итүнең 81 еллыгы уңаеннан татарстанлыларга мөрәҗәгать итте.
«Кадерле татарстанлылар! Хөрмәтле Бөек Ватан сугышы ветераннары! 1944 елның 27 гыйнвары – Бөек Ватан сугышы тарихында иң бөек даталарның берсе. Татарстан Республикасы Хөкүмәте исеменнән сезне совет гаскәрләре тарафыннан Ленинградны немец-фашист блокадасыннан тулысынча азат итүнең 81 еллыгы белән котлыйм.
Ленинградның 900 көнлек оборонасы - Бөек Ватан сугышының иң фаҗигале сәхифәләренең берсе. Барлык мәхрүм ителүләргә карамастан, Невадагы шәһәр бирешмәде һәм җиңеп чыкты. Халкыбыз, дошман белән генә түгел, салкыннар, ачлык һәм өметсезлек белән дә көрәшеп, гаҗәеп ныклык һәм фидакарьлек күрсәтте.
Бүген без Ватаныбызның киләчәге өчен гомерләрен биргәннәр истәлегенә баш иябез, ветераннарга һәм блокададагы Ленинградта яшәүчеләргә, шушы авыр чорларны кичерүчеләргә тирән рәхмәтебезне белдерәбез. Аларның батырлыгы безнең өчен һәрвакыт каһарманлык һәм Ватаныбызга мәхәббәт үрнәге булачак.
Һәлак булган геройларның якты истәлеге күңелләрдә, исәннәргә баш иябез. Безнең йөрәкләрдә бернинди сынаулар белән дә сындыра алмаган бөек халык өчен горурлык яшәсен.
Сезгә сәламәтлек, кадерле ветераннарыбыз, бәхет һәм иминлек телим!» диелә мөрәҗәгатьтә.