Казан һәм башка берничә шәһәрдә яшәүчеләр өчен ОСАГО полислары арзаная

Казан, Барнаул, Волгоград, Красноярск, Түбән Новгород һәм Чиләбе шәһәрләрендә яшәүчеләр өчен бүгеннән ОСАГО полислары арзанаерга тиеш. Элегрәк Россия Банкы раслаган яңа территориаль коэффициентлар гамәлгә керә.

РФ Үзәк банкының 6949-У күрсәтмәсе нигезендә, Казанда территориаль коэффициент 1,8дән 1,7гә кадәр киметелде. Татарстанның башка торак пунктларында территориаль коэффициентлар элеккеге дәрәҗәдә калды.

Шул ук вакытта Барнаулда территориаль коэффициент 1,56дан 1,48гә кадәр, Волгоградта 1,24тән 1,21гә кадәр, Красноярскта 1,64тән 1,56га кадәр, Түбән Новгородта 1,64тән 1,56га кадәр, ә Чиләбедә 1,88дән 1,77гә кадәр киметелгән.

Җәмәгать транспорты өчен тариф коридорының чикләре исә ике якка да 11,57 процентка, мототранспорт һәм рөхсәт ителгән максималь массасы 16 тонна һәм аннан кимрәк булган йөк машиналары өчен 20 процентка киңәйтелә.

«Мультидрайв» ОСАГО полисларына (машина йөртүче күрсәтелми торган иминиятләштерү) коэффициент та арта. Бу хакта элегрәк «Татар-информ» хәбәр иткән иде.