Көзен Россиядә пациентлар яман шешкә каршы вакцина ала башлаячак
Сентябрьдә беренче пациентларны дәвалау өчен онковакцина куллана башлаячаклар. Россия Сәламәтлек саклау министрлыгының Гамалея исемендәге эпидемиология һәм микробиология фәнни-тикшеренү институты директоры Александр Гинцбург РИА Новости агентлыгына шулай дип белдерде.
Россиядә яман шешкә каршы берничә дару ясыйлар, шуларның берсе Гамалея үзәгендә әзерләнә.
Элегрәк Гинцбург агентлыкка хәбәр иткәнчә, онкология авыруларына каршы аның җитәкчелегендә ясала торган вакцина һәр пациент өчен индивидуаль рәвештә әзерләнәчәк. Препаратны ясауда ясалма интеллект ярдәм күрсәтә, ул шешнең характеристикасын анализлап, булачак даруның схемасын тәкъдим итә. Әлеге мәгълүматлар нигезендә белгечләр нибары бер атна эчендә вакцина әзерли алачак.
«Без Сәламәтлек саклау министрлыгына тәкъдим иткән юл картасы планы (ул әле тулаем расланмаган) нигезендә, сентябрьдә кешеләрне дәвалый башлау мөмкинлеге булсын өчен, без август ахырында рөхсәт алырга тиеш», - диде Гинцбург. Аның әйтүенчә, вакцина беренчел меланома ачыкланган авырулар гына түгел, терапиянең билгеле бер этапларын узган пациентлар өчен дә билгеләнгән.