Николич Аббосбек Файзуллаевни хатоси учун танқид қилди!

Россия Премьер-лигасида иштирок этаётган ЦСКА мавсумнинг иккинчи ярмига жиддий тайёргарлик кўрмоқда. Тайёргарлик босқичи доирасида “армиячилар” Россия Премьер-лигасининг қишки кубоги мусобақаси доирасида мамлакатнинг энг кучли клуби “Зенит” билан куч синашди.

Абу-Дабида ташкил этилган учрашувнинг асосий вақти 2:2 ҳисобида дуранг билан якунланди. Питерликлар ўйиннинг сўнгги дақиқасида Аббосбек Файзуллаевнинг хатоси натижасида ҳисобни тенглаштирди. Ғолиб пенальтилар сериясида аниқланди. Аббосбек 11 метрлик нуқтадан гол ура олмади.

21 ёшли ҳужумкор футболчимиз тайёргарлик жараёни жамоадаги ўзгаришлар, ўзининг янги вазифаси, ЦСКАнинг жорий мавсумдаги мақсадлари ҳақида гапирди.

- Қишки ўқув-машғулот йиғинлари доим қийин ўтади, чунки юкламалар кўп, машғулотлар жуда мураккаб. Биз чемпионатга тайёргарлик кўряпмиз. Тайёргарлик жуда яхши кетяпти, деб ўйлайман.

Биз янги ўйин схемасига ўтдик ва ҳозир уни ўзлаштиришга эътибор қаратганмиз, унга кўникиш учун бироз вақт талаб этилади. Янги схема бўйича биз тўпга кўпроқ эгалик қиламиз.

Позициям ўзгарди. Илгари мен бу даражада майдон ичкарисидан ҳужум қилмаганман. Бу усулда илгари Ўзбекистон терма жамоасида ўйнаб кўрган эдим.

Ўйинда боримни беришга ҳаракат қиламан, айни пайтда мураббий мени 8-рақам позициясида ўйнатяпти. Болалигимдан 10-рақам ўрнида ўйнаб келганман ва бу жойда ўзимни анча қулай ҳис қилардим. Ҳозир ўзимнинг янги қирраларимни кашф қиляпман, дейишим мумкин. Вақт берилса, ҳужум схемасида бу позицияда ҳам самарали ўйнашни ўрганиб оламан.

Ўйлашимча, тайёргарлик йиғинларидан кейин яхши ўйнай бошлаймиз ва чемпионатда кучли учликдан жой олишни уддалаймиз. Ўзимиз ҳам совринли ўринларни эгаллашни истаймиз. Баҳорда сюрприз қила оламиз. Икки йил олдин ҳам жамоа қишда 5-6-ўринда бўлган ва чемпионатни иккинчи ўринда якунлаган. Ҳамма нарсанинг имкони бор, - деди Аббосбек Файзуллаев.

Таъкидлаш жоизки, ЦСКА бош мураббийи Марко Николич Аббосбек Файзуллаевнинг “Зенит” билан ўйиннинг сўнгги сонияларида хатога йўл қўйиб, ҳисобнинг тенглашишига сабабчи бўлганини беэътибор қолдирмади ва легионеримизни танқид қилди.

- “Зенит” билан ўйинимиз жуда оғир ўтди. Томошабинлар учун бироз зерикарли ўйин бўлиши мумкин, лекин менга жамоанинг иштиёқи ёқди. Майдонда кураш ва қоида бузишлар кўп бўлди. Агар ҳамма ҳозирдан енгил ҳаракат қилганида бу ғалати туюларди. Чунки чемпионат тикланишига ҳали бир ой вақт бор.

Менга охирги паллада гол ўтказиб юборганимиз умуман ёқмади. Аббосбек уч сонияга тўпни йўқотди. Футболда ҳаммасини мана шунақа майда нарсалар ҳал қилади, - деди Марко Николич.

ЦСКА чемпионатнинг биринчи қисмида 18 та учрашувда 31 очко жамғариб, мусобақа жадвалининг олтинчи поғонасида бормоқда.

Аббосбек Файзуллаевнинг ўзи жорий мавсумда барча турнирларда 23 та учрашув ўтказиб, учта гол ва олтита ассист муаллифи бўлди.