Казанның Апанай мәчетендә Бәраәт кичәсенә багышланган чаралар була
13 февральдән 14 февральгә каршы кичтә бөтен ислам дөньясы мөселман календарендагы мөһим датаны – Бәраәт кичәсен билгеләп үтәчәк. Бу турыда Татарстан Диния нәзарәте хәбәр итте.
13 февраль көнне (пәнҗешәмбе) 15.00 сәгатьтә Казанда Апанай мәчетендә Бәраәт кичәсенә багышланган чара үткәрелә. Бу көнне мәчеткә җыелган халыкка Бәраәт кичәсенең һәм нәфел намазларның фазыйләтләре турында вәгазьләр сөйләнә, Коръән аятьләре һәм салаватлар укыла.
Кичәгә Апанай мәчете мәхәлләсе, шулай ук Казан шәһәре мөселманнары, Татарстан башкаласы кунаклары чакырыла, диелә хәбәрдә.