Кама Аланында Түбән Кама районының 60 еллыгы ачылды

Кама Аланында Түбән Кама районының 60 еллыгына багышланган тантаналы чара узды. «Чулман-Су» мәдәният үзәгенә бәйрәм концертына район башлыгы Рамил Муллин, район башкарма комитеты вәкилләре һәм авыл җирлекләреннән төрле тармак ветераннары килде. Бу хакта https://tat.e-nkama.ru сайтында хәбәр ителә.

Чарада төрле һөнәр ияләрен: табиблар, педагоглар, авыл хуҗалыгы, сәүдә хезмәткәрләре, район җитәкчелеге, авыл җирлекләре башлыкларын һ.б. ветераннарны хөрмәтләделәр һәм искә алдылар. Район Эчке эшләр идарәсе ветераннарын аерым билгеләп үттеләр – нәкъ шушы көнне 60 ел элек Түбән Кама буенча Россия Эчке эшләр министрлыгы булдыру турында указ чыккан. Авыл җирлекләрендә төрле һөнәр ияләре булган ветераннарга истәлекле бүләкләр тапшырдылар.

«Түбән Кама районының һәр көне – ул тулы бер тарих. Түгәрәк дата шаһиты булу шатлыклы. Бүген безнең 60 еллыгыбызны билгеләп үтү – районның барлыкка килү башында торган өлкән буынга хөрмәт күрсәтү ул. Әлеге үсеш чоры Түбән Кама һәм республика тарихы өчен генә мөһим түгел. Минемчә, Түбән Кама ил тарихында әһәмиятле урын алып тора», – дип белдерде Рамил Муллин.

Рамил Муллин РФ Президенты карары нигезендә «Бөек Ватан сугышында Җиңүгә 80 ел» юбилей медален Кама Аланы тыл хезмәтчәне Бакланов Николай Николаевичка тапшырды, сугыш башланганда аңа 12 яшь булган. Сугыш елларында ул механизатор ярдәмчесе булып эшли, «Прикамский» совхозында тракторчы була.

Фото: https://tat.e-nkama.ru/.

Түбән Кама муниципаль районы башлыгы ярдәмчесе, районның Ветераннар советы рәисе Григорий Китанов билгеләп үткәнчә, районның бай тарихын истә тоту һәм аның үсешенә зур өлеш кертүләре хөрмәт белдерү бик мөһим. Чараның тантаналы өлеше авыл җирлекләрендә җыелган вокаль ансамбльләрнең һәм бию коллективларының концерт номерлары белән үрелеп барды.