Россиялеләргә паникага бирелеп валюта сатып алудан сакланырга куштылар
Валютаны паникага бирелеп сатып алу, гадәттә, тискәре нәтиҗәләргә китерә. Шәхси инвестор, Гамәли инвестицияләү мәктәбенә нигез салучы Федор Сидоров RT телеканалына шундый фикерен белдерде.
Белгеч аңлатканча, ыгы-зыгы шартларында акча алмаштыру пунктларында валюта курслары да, сатып алу һәм сату арасындагы аерма да арта. Нәтиҗәдә, валюта сатып алу отышлы булмый.
«Россиялеләрнең мондый «ярсулы» реакциясе вазгыятьне катлауландыра гына: ихтыяҗның кискен артуы валютага вакытлыча кытлык барлыкка килүенә, бу исә бәяләрнең алга таба үсешенә китерә. Банклар һәм валюта алмаштыручылар, ихтыяҗ югары булуын күреп, сату курсларын арттыралар, ә алыпсатарлар базардагы билгесезлектән файда ала», - дип сөйләде Сидоров.
Инвестор билгеләп үткәнчә, мондый вакытта тынычлыкны саклап калу һәм паникага бирелмәү күпкә яхшырак. Валюта базары циклик тирбәнешләргә дучар була һәм кискен үзгәрешләрдән соң, гадәттә, коррекция барлыкка килә. Ыгы-зыгының иң көчәйгән вакытында валюта сатып алучылар, курс тотрыклы хәлгә килгәч, еш кына акчасын югалта.