Премьер-лигада жанговор ўйин: Ньюкасл 4-3 ҳисобида ғалаба қозонди

Англия Премьер-лигасининг бугунги марказий учрашувларидан бири Ньюкасл Юнайтед Ноттингем Форестни 4:3 ҳисобида мағлуб этди. Учрашув томошабинларга ҳақиқий футбол шоуни тақдим этди.

Ньюкасл сафига Луи Майли (23'), Жамол Ласкеллес (27') ва Александер Исак (33', 34') гол урди. Исакнинг тезкор дублигига қарамай, Форест ўйиндан воз кечмади ва охиригача курашди. Улар сафида Каллум Хадсон-Одои (6'), Никола Миленкович (63') ва Райан Йейтс (90') гол уриб, интригани сақлаб қолди.

Статистикага кўра, Ньюкасл тўпга эгалик қилишда устунлик қилди (57%) ва 451 та аниқ пас оширди. Форест эса ҳужумда фаоллик кўрсатиб, рақиб дарвозасига 17 та зарба йўллади. Жамоалар кескин кураш олиб борди – Ньюкасл 11, Форест эса 13 марта қоида бузди.

Ғалаба эвазига Ньюкасл 44 очкога эга бўлиб, 5-ўринга кўтарилди, Форест эса мағлубиятга қарамай 47 очко билан 3-ўринда қолди.