Трамп АҚШга кўчиб ўтиш учун «олтин карталар» жорий этилишини эълон қилди
0
Қўшма Штатлар бой хорижликларга «олтин карталар» деб аталувчи, Қўшма Штатларда яшаш ва ишлаш ҳуқуқини берувчи ҳамда Америка фуқаролигига йўл очадиган карталарни сотади. Бу ҳақда мамлакат президенти Доналд Трамп 25 феврал, сешанба куни Овал кабинетда журналистлар билан суҳбатда маълум қилди. Унинг таъкидлашича, «олтин карта»нинг нархи тахминан 5 миллион АҚШ долларини ташкил қилади.
«Биз олтин картани сотмоқчимиз», деб ўз веб-сайтида давлат раҳбарининг сўзларидан иқтибос келтиради CNN. «Сизда яшил карта бор. Бу эса - олтин карта. Биз бу картани тахминан 5 миллион долларга баҳолаймиз ва бу сизга яшил карта имтиёзларини беради, плюс фуқароликни осон олиш имконини яратади. Бой одамлар бизнинг мамлакатимизга келиб, бу картани сотиб олади».
«Олтин карта» EB-5 иммиграцион визалари ўрнини босади
АҚШ савдо вазири Говард Лютникнинг тушунтиришича, олтин карта ҳукуматнинг EB-5 иммиграцион визаси дастури ўрнини босади.
Трампнинг сўзларига кўра, олтин карталар савдоси икки ҳафта ичида бошланиши мумкин. У миллионлаб карталар сотилишини кутмоқда. «Ҳуқуқий нуқтайи назардан, бу мутлақо қонунийдир», деди АҚШ президенти.
«Россиялик олигархларга олтин карталарни сотишга тайёрмисиз» деган саволга Доналд Трамп шундай жавоб берди: «Ҳа, балки. Мен жуда яхши одамлар бўлган баъзи рус олигархларини биламан».