Белгеч хәтта суд та ала алмый торган пенсия түләвен атады

Тиешле суд карары чыгарганда пенсия акчасын бурычлар, законсыз гамәлләр, җинаятьләр өчен һәм башка очракларда тотып калырга мөмкиннәр, әмма бер искәрмә бар. Г.В.Плеханов исемендәге Россия икътисад университетының дәүләт һәм муниципаль финанслар кафедрасы доценты Ольга Леонова шулай дип белдерде. Бу хакта «Прайм»агентлыгы хәбәр итә.

Коммуналь түләүләр, банктагы кредитлар, соңрак түләү шарты белән сатып алу һәм башка сәбәпләр буенча җыелган бурычлар аркасында тотып калынган акча күләме иминият пенсиясенең һәм иминият пенсиясенә билгеләнгән түләүнең (аны арттыруны исәпкә алып) 50 процентыннан да артып китә алмый. Счеттагы акчаларның калган яртысы кагылгысыз - бу пенсионерның тормыш дәрәҗәсен саклау өчен кирәк. Акчаны бу рәвешле тотып калу башкарма документлар, пенсия белән тәэмин итүне гамәлгә ашыручы орган һәм суд карарлары нигезендә башкарыла.

Законсыз гамәлләр аркасында билгеле бер сумманы түләттерү турында суд карары булганда да акчаның тотып калынган күләме 50 проценттан артмаска тиеш. Биредә белә торып ялган белешмәләр, дөрес булмаган таныклыклар, документлар бирү яки пенсиягә хокукны кире кага торган мәгълүматларны яшерү турында сүз бара.

Шуның белән бергә, пенсионер җинаять кылган, сәламәтлегенә китерелгән зыянны каплаган яисә балигъ булмаган балаларга алимент түләгән очракта пенсиянең күпчелек өлеше – 70 проценты тотып калынырга мөмкин.