Владимир Путин кибермошенниклыкка каршы көрәшкә юнәлдерелгән законны раслады
Россия Президенты Владимир Путин элемтә һәм цифрлы технологияләр өлкәсендә мошенниклыкка каршы торуга юнәлдерелгән законга имза куйды. Документ хокукый актларның рәсми сайтында чыкты. Ул гражданнарны киберҗинаятьчеләрдән яклауны көчәйтә торган чаралар комплексын тәкъдим итә.
Аерым алганда, «Дәүләт хезмәтләре»ндә SIM-карталарны һәм халыкара шалтыратуларны дистанцион рәсмиләштерүне чикләү, шулай ук спам-шалтыратуларны һәм СМС-таратуларны тыю мөмкинлеге барлыкка киләчәк. Пароль алышынганда кулланучылар ике белдерү ала, ә раслау кодлары белән хәбәрләр шалтыратулар вакытында килмәячәк. Әгәр телефон номеры хуҗасы аннан баш тартса, «Дәүләт хезмәтләре»ндә шәхси кабинетыннан һәм банк кушымталарыннан иске телефон номеры автомат рәвештә алыначак.
Моннан тыш, шалтыратулар оешма исемен чагылдырып маркировкалана башлаячак, ә дәүләт учреждениеләре, банклар һәм элемтә операторлары клиентлар белән эшләү өчен чит ил мессенджерларын куллана алмаячак. Банк операцияләре өстәмә контрольгә дучар ителәчәк: шикле гамәлләр кылынган очракта, акча бирү 48 сәгатькә чикләнергә мөмкин, ә антифрод-системалар онлайн-түләүләргә генә түгел, ә банкоматлардагы операцияләргә дә кагыла торган була. Шулай ук россиялеләр микрозаймнарны рәсмиләштергәндә биометрияне куллана ала.
Киберҗинаятьчелек белән көрәшү өчен дәүләт мәгълүмат системасы булдырыла, ә закон үзе, башка сроклар белән аерым нигезләмәләрдән тыш, 1 июньнән үз көченә керә.