Миңнеханов һәм Развожаев Татарстан-Севастополь арасындагы килешүне яңартырга сөйләште

KazanForum кысаларында Татарстан Рәисе Рөстәм Миңнеханов Севастополь губернаторы Михаил Развожаев белән хезмәттәшлекне киңәйтү турында фикер алышты. Бу хакта республика җитәкчесенең матбугат хезмәте хәбәр итә.

Республика җитәкчесе сүзләренчә, бүген Севастополь актив үсештә, социаль-икътисади һәм инфраструктура проектларын уңышлы тормышка ашыра. «Севастополь һәм Татарстанны хезмәттәшлек мөнәсәбәтләре бәйли. Эшлекле элемтәләрне ныгыту өчен яхшы нигез бар», – дип ышана Рөстәм Миңнеханов.

2015 елдан Татарстан һәм Севастополь арасында сәүдә-икътисади, фәнни-техник, социаль һәм мәдәни хезмәттәшлек турында килешү гамәлдә. Җитәкчеләр әлеге документны яңарту һәм аны тормышка ашыру буенча юл картасы төзергә килеште.

Татарстан Рәисе энергетика, машина төзелеше, IT һәм югары технологияләр өлкәсендә, медицина һәм фармацевтика, агро-сәнәгать комплексы, шулай ук мәдәният, фән һәм мәгариф өлкәләрендә элемтәләрне ныгыту өчен зур потенциал барлыгына да игътибар юнәлтте.

Михаил Развожаев Севастополь белән хезмәттәшлеккә аерым игътибар өчен Рөстәм Миңнехановка рәхмәт әйтте. Губернатор республиканың туризм һәм кунакчыллык инфраструктурасында, шулай ук инвестицияләр җәлеп итүдә казанышларын югары бәяләде. «Сезнең тәҗрибәне һәм иң яхшы практикаларыгызны үзләштерергә бик шат булачакбыз», – диде ул.

«Россия — Ислам дөньясы: KazanForum» Халыкара икътисад форумы Казанда 13 – 18 майда уза. KazanForum 2009 елдан башлап Татарстанда ел маен уздырыла. 2023 елдан әлеге чара федераль статус алды. Татарстан Рәисе Рөстәм Миңнеханов Россия Президенты Владимир Путин йөкләмәсе буенча «Россия – Ислам дөньясы» Стратегик караш төркемен җитәкли.