Россиядә бәяләр кимү фонында Казанда икенчел торак бәяләре тотрыклы булып кала

Россиядә әзер торак сатуның уртача бәясе соңгы ярты елда 7 процентка диярлек төшкән – 4,58 миллион сумнан 4,29 миллион сумга кадәр. Мондый мәгълүматларны «Этажи» федераль компаниясе аналитиклары тәкъдим иткән. Аларны «Известия» китерә.

Бу соңгы биш елда күзәтелгән иң сизелерлек кимү: моңа кадәр икенчел торакка бәяләр тәкъдим артыннан арта килде, ә бәяләрне җайга салу озакка сузылмады һәм 2-3 проценттан артмады.

Соңгы ярты елда бәяләр барыннан да ныграк Ростов Донда (-15 процент), Краснодарда (-12 процент), Пермьдә (-11 процент) һәм Красноярскида (-7,5 процент) кимегән. Шул ук вакытта Мәскәүдә һәм Казанда әзер торакның уртача бәясе тотрыклы булып кала.

«Этажи» компаниясенең әйдәп баручы аналитигы Александр Иванов аңлатканча, икенчел торак базары классик законнарга карамастан үсә: ихтыяҗ кимесә дә, тәкъдим һаман арта бара. Әмма килешүләрнең реаль бәясе кими, чөнки ихтыяҗ күбесенчә сатулашу мөмкин булган объектларга туры килә.

Эксперт фаразларына караганда, якындагы ике-өч айда Россиядә реаль сатуның уртача бәясе тагын 3-4 процентка кимергә мөмкин, чөнки бүгенге базар ставкалары белән ипотека алырга әзер булган сатып алучылар саны бик аз.