Амрико як қисм таҳримҳоро алайҳи Сурия бекор кард

Маъмурияти Доналд Трамп аз бекор шудани баъзе таҳримҳо алайҳи Сурия ва содир шудани иҷозатнома барои сармоягузорӣ дар ин кишвар хабар дод. Дар иттилоияи Кохи Сафед аз рӯзи 23-юми май омадааст, ин иқдом бо ҳадафи бозсозии Сурия пас аз солҳо ҷанги дохилӣ анҷом шудааст.

Ҳамзамон Кохи Сафед аз Димишқ хостааст, то ихроҷи ҷангҷӯёни хориҷиро оғоз кунад.

Вазорати хориҷаи Амрико 23-юми май бо судури як муҷаввиз эълон кард, ки додугирифти молӣ бо давлати муваққати Сурия, бонки марказӣ, бахши ҳавонавардӣ ва ширкатҳои давлатии Сурия иҷозат аст.

Рӯзи 13-уми май Доналд Трамп дар сафараш ба Арабистони Саудӣ эълон кард, ки Вашингтон таҳримҳо алайҳи Сурияро бекор мекунад. Ин таҳримҳо зидди режими президенти пешин Башор Асад ҷорӣ шуда буданд, ки моҳи декабри соли гузашта аз қудрат барканор гардид.