Девид Бэкҳемга рицарлик унвони берилади – тарихий эътироф!

Англия футболининг афсонаси, миллионлаб мухлислар қалбини забт этган Девид Бэкҳемнинг номи яна бир бор оламшумул эътирофга сазовор бўлди. BBC Sport хабарига кўра, келаётган ҳафтада машҳур футболчи рицарлик унвони билан тақдирланади.

Ушбу юксак мукофот Британия қироли Чарлз III нинг расмий туғилган куни муносабати билан июн ойи ўрталарида эълон қилинадиган мукофотланганлар рўйхати орқали берилади. Шу тариқа, Бэкҳем расман “сэр” унвонини қабул қилади, унинг рафиқаси, Spice Girls гуруҳининг собиқ аъзоси Виктория Бэкҳем эса “леди” мақомига эга бўлади.

Мазкур шонли эътироф Бэкҳемнинг нафақат футболчи сифатидаги, балки спортдан ташқаридаги фаолияти, хайрия тадбирлари ва дипломатик ҳаракатлари учун ҳам берилаётганини таъкидлаш жоиз. The Guardian’нинг маълум қилишича, Девид ва Виктория Бэкҳемлар сўнгги йилларда қироллик оиласи тадбирларида фаол иштирок этиб келмоқда. Жумладан, май ойида Челсидаги анъанавий гуллар кўргазмасида, февралда эса Чарлз III нинг Ҳайгроув қароргоҳида ташкил этилган Англия—Италия муносабатларига бағишланган расмий кечки овқатда қатнашишган.

Бэкҳемнинг футболдаги ютуқлари ҳақида гап кетганда, унинг «Манчестер Юнайтед» сафида олти бор Англия Премьер-лигасида чемпион бўлгани ва 1999 йилда Чемпионлар лигасида зафар қучгани эътирофга лойиқ. Шунингдек, у «Реал Мадрид», «Милан», ПСЖ ва «Лос-Анжелес Гелакси» каби дунё грандларида тўп сурган. Англия терма жамоаси сафида эса 115 та учрашув ўтказиб, 17 та гол урган.

Айни пайтда Бэкҳем футболдаги фаолиятини бошқача йўналишда давом эттирмоқда — у Лионел Месси ҳаракат қилаётган Америка клуби “Интер Майами”нинг ҳаммуассисларидан бири саналади.

Эндиликда у нафақат футбол юлдузи, балки Буюк Британия рицари сифатида ҳам тарихда қолади. Бу нафақат Бэкҳемнинг шахсий зафари, балки спорт оламидаги фидокорликнинг олий намунаси ҳамдир.