Төрек журналының яңа санында татар язучыларының әсәрләре басылды

Анкара шәһәрендә нәшер ителә торган «Кардәш каләмнәр» журналының июнь санында татар язучыларының әсәрләре басылды. Бу хакта ТР Язучылар берлеге матбугат хезмәте хәбәр итә.

Мәгълүм булганча, журнал һәр санында хәзерге заман татар әдәбиятыннан үрнәкләр биреп бара. Бу санында Марат Кәбировның Төркиядә яшәүче каләмдәшебез Чулпан Зариф-Четин тәрҗемәсендә «Канатлы кеше» хикәясе басылып чыккан.

Быелгы Тукай премиясенә ия булган шагыйребез Рәниф Шәриповның тормышы һәм иҗаты турында Чулпан Зариф-Четинның үз мәкаләсе дә журнал битләрендә урын алган. Шулай ук шагыйрьнең шигырьләре дә төрек укучысына тәкъдим ителгән.