1 сентябрдан барча мактабларда юз таниш тизими ишлайди

Янги 2025/2026 ўқув йили бошланиши арафасида мамлакат мактабларида таълим соҳасида янги технологиялар жорий этилмоқда. «Хавфсиз мактаб» лойиҳаси доирасида барча умумтаълим мактабларига замонавий биометрик кузатув тизимлари ўрнатилади. Бу янгилик мактабда болалар хавфсизлигини таъминлаш, дарсга қатнашувни назорат қилиш ва ота-оналарга тезкор маълумот етказишни мақсад қилади.

Янги тизим нима билан фарқ қилади?

- Ҳар бир ўқувчи мактабга киришда юзи орқали автоматик тарзда рўйхатдан ўтади. Бунда махсус камералар ёрдамида боланинг мактабга келган-келмагани аниқланади;

- Агар бола мактабка умуман келмаса, бу ҳақда ота-онанинг телефонига автоматик СМС хабар юборилади;

- Мактаблардаги кузатув камералари кечикиб келишлар, интизом бузилишлари ёки бошқа фавқулодда вазиятларни ҳам тасвирга олади.

Мазкур чора-тадбирлар нафақат болаларнинг хавфсизлигини кучайтириш, балки уларнинг дарсга мунтазам қатнашишини таъминлаш ва ота-оналар билан мактаб ўртасидаги ҳамкорликни янада мустаҳкамлаш учун муҳим аҳамият касб этади.

Мутасаддиларнинг таъкидлашича, бу тизим босқичма-босқич жорий этилади ва ўқув йили бошлангунча барча мактабларда тўлиқ ишга туширилади. Бу орқали ҳар бир ўқувчининг мактабдаги иштироки реал вақтда назорат қилинади.

Қисқаси, сентябрдан бошлаб мактаблар нафақат билим улашиш маскани, балки юқори даражада назорат қилинувчи ва хавфсиз маконга айланади. Ота-оналар эса фарзандларининг қайси вақтда мактабга келгани ёки келмагани ҳақида доимий хабардор бўлиб бориш имкониятига эга бўлишади.