Самарқандда чиқинди қабул қилиш тарифлари кескин оширилди

Самарқанд вилоятида маиший чиқиндиларни полигонда қабул қилиш ва сақлаш нархлари янада юқорилашди. Бу ҳақда Халқ депутатлари Самарқанд вилояти кенгаши томонидан қабул қилинган расмий қарор 2025 йил 20 июнь куни эълон қилинди.

Унга кўра, энди чиқинди ташловчи ташкилот ва фуқаролар янги тарифлар асосида тўлов қилишларига тўғри келади. Қарор иловасида қайд этилишича, чиқиндиларни қабул қилиш нархи 1 метр квадрат учун ҚҚСсиз 16 433 сўмни, ҚҚС билан эса 18 405 сўмни ташкил этади.

Шунингдек, 1 тонна чиқинди учун белгиланган нарх ҚҚСсиз 39 886 сўм, ҚҚС билан эса 44 672 сўм қилиб белгиланган.

Мутахассисларнинг таъкидлашича, нархлар инфляция, хизмат кўрсатиш харажатлари ҳамда полигонлар инфратузилмасини янгилаш зарурати билан боғлиқ ҳолда қайта кўриб чиқилган.

Янги тартиб қарор эълон қилинган кундан бошлаб кучга кирган бўлиб, Самарқанд вилоятидаги барча чиқинди ташловчи субъектлар ушбу тарифларга риоя қилишлари талаб этилади.

Мазкур ўзгариш аҳолини чиқиндиларни саралаб ташлаш, қайта ишлашга йўналтириш ва экологик маданиятни ошириш мақсадида амалга оширилмоқда.