Минск шәһәрендә Евразия икътисади советының тар составтагы утырышы башланды
Минск шәһәренең Бәйсезлек сараенда Югары Евразия икътисади советының тар составтагы утырышы башланды. Очрашу Россия Президенты Владимир Путин катнашында уза. Бу хакта ТАСС хәбәр итә.
Россия дәүләте башлыгы һәм Белоруссия президенты Александр Лукашенкодан тыш, чарада Казахстан Президенты Касым-Жомарт Токаев һәм Кыргызстан президенты Садыр Жапаров катнаша. Әрмәнстан Премьер-министры Никол Пашинян утырышка видеоэлемтә аша кушылды.
Элегрәк РФ Президенты ярдәмчесе Юрий Ушаков хәбәр иткәнчә, әлеге ябык очрашу кысаларында дәүләт башлыклары Евразия икътисади советы кысаларындагы аеруча әһәмиятле мәсьәләләр турында фикер алыша алачак. Евразия икътисади комиссиясе коллегиясе башлыгы Бакытҗан Сагынтаевның докладыннан соң ирекле дискуссия уздыру планлаштырыла.
Соңрак советның киңәйтелгән форматтагы утырышы була. Аңа күзәтүче дәүләтләр – Куба һәм Үзбәкстан, шулай ук кунак илләр — Монголия һәм Берләшкән Гарәп Әмирлекләре вәкилләре кушылачак.