Տհաճ տեսարան է, երբ քաղաքական ուժերը փորձում են հոգևոր հայրերին ներքաշել քաղաքական խաղերի մեջ. Աննա Կոստանյան

«Մեդիալաբի» հարցերին պատասխանում է «Լուսավոր Հայաստան» կուսակցության անդամ, ՀՀ Ազգային ժողովի նախկին պատգամավոր Աննա Կոստանյանը 

– Տիկի՛ն Կոստանյան, նախօրեին Էդմոն Մարուքյանը հայտարարեց, որ Հովիկ Աղազարյանի ու Հակոբ Ասլանյանի հետ որոշել են իմփիչմենթի գործընթացը սկսելու համար վարչապետի թեկնածու առաջադրել Շիրակի թեմի առաջնորդին, որն այդ ընթացքում Քննչական կոմիտե էր կանչվել: Խորհրդարանական ընդդիմությունը համաձայնեց սկսել գործընթացը, բայց Սրբազանը մերժեց այդ առաջարկը: Ինչպե՞ս եք գնահատում թե՛ առաջարկը, թե՛ Միքայել Սրբազանի մերժումը:

– Եթե նման մտայնություն կար, ապա պետք է նախօրոք խոսեին Սրբազանի հետ ու ստանային կա՛մ մերժում, կա՛մ հաստատում, սա չի արվել։ Առաջարկն արվեց այն ժամանակ, երբ Սրբազան Հայրն արդեն պետք է Քննչական կոմիտե գնար, ու հավանական էր, որ նրան կալանավորելու էին: 

Սա քաղաքական դասավորությունների հերթական դրսևորում է, այսինքն՝ բոլոր այն մարդիկ, որոնք փորձում են օգտագործել իրավիճակը քաղաքական որոշակի վերադասավորումների համար, փորձելով օգտագործել Սրբազանի անհամեմատ մեծ հեղինակությունը, գնդակը նետել նրա դաշտ ու մերժման դեպքում մեղավորությունը բարդել նրա վրա, որ, դե, մենք մեր ամբիցիաները մի կողմ դրեցինք, առաջարկեցինք, նա էլ մերժեց: 

Անկեղծ ասած, ինձ համար սրանք բավականին տհաճ տեսարաններ են, որովհետև հոգևորականի շուրջ առանց այն էլ փաստացի տեղի ունեցող այդ լուրջ իրադարձությունների ֆոնին ստացվում է, որ քաղաքական ուժերը փորձում են հոգևոր հայրերին ներքաշել քաղաքական խաղերի մեջ, համենայնդեպս, առաջին տպավորությունը դա է: 

Ես բազմիցս շփվել եմ Միքայել արքեպիսկոպոս Աջապահյանի հետ, ու նա երբևէ վարչապետի թեկնածու առաջադրվելու նման հավակնություններ չի ունեցել։ Երկրորդ հոգևորականի առաջադրումը վարչապետի թեկնածու քաղաքական տեսանկյունից համարում եմ շատ անխոհեմ քայլ, որովհետև առաջին դեպքում դա հաջողություն չունեցավ տարբեր պատճառներով, երկրորդ անգամ նույն քայլին գնալն արդեն դիտավորություն է ընկալվում: 

– Կարծիքներ են հնչում, որ իմփիչմենթի գործընթաց նախաձեռնելն ինքնին անիմաստ է, որովհետև միևնույն է, ընդդիմությունը չունի բավարար թվով ձայներ, ու նրանց պետք է լինելու նաև իշխանությունից որոշակի ձայներ ստանալ, ինչը քիչ հավանական է համարվում:

– Քաղաքական գործողություններ են, իհարկե չպետք է բացառել, որ իմփիչմենթը հաջողությամբ կավարտվի, բայց դրա համար մինչ այդ պետք է աշխատանք տանել իշխանական պատգամավորների հետ, որպեսզի հնարավոր լինի պակասող ձայները ստանալ: Մինչև չփորձենք, չենք կարող հասկանալ՝ կունենա՞նք այդ ձայները, թե՞ չէ: 

Ես, իհարկե, շատ քիչ հավանական եմ համարում, որ կկարողանան այդ պատգամավորներին համոզել, որովհետև Նիկոլ Փաշինյանը բոլոր լծակները օգտագործել է նրանց վերահսկողության տակ պահելու համար՝ ոմանց կոմպրոմատներով, ոմանց էլ, ժողովրդի լեզվով ասած՝ լավ նայելով:

– Տիկի՛ն Կոստանյան, ինչ հնարավոր զարգացումներ կարելի է սպասել, որովհետև հնչում են կարծիքներ, որ Նիկոլ Փաշինյանը մինչև վերջ է գնալու, ու հաջորդը կարող է ձերբակալվել Վեհափառը: Նման սցենարը հնարավո՞ր եք համարում:

– Իհարկե հավանական եմ համարում, եկեք չմոռանանք, որ Եկեղեցու դեմ այս արշավն ուժգին դրսևորում ստացավ Փաշինյանի՝ Անկարայից վերադառնալուց հետո: Առնվազն կարելի է ենթադրել, որ մարդը հրահանգ է ստացել Եկեղեցին ուղղակի ոչնչացնել: Ու հիմա փարիսեցիաբար փորձում է դա հիմնավորել, իբր թե պաշտպանում ու մաքրում է Եկեղեցին: 

Այս գործընթացների հետևանքները շատ վատ են լինելու, զուգահեռ գործընթաց է տեղի ունենում Թուրքիայի հետ, որն այս պահին չի երևում, ու ինչ-որ պահի շատ հնարավոր է՝ մեզ կանգնեցնեն փաստի առաջ, օրինակ՝ թուղթ հրապարակեն, որով համաձայնություններ են ձեռք բերել Թուրքիայի ու Ադրբեջանի հետ։ հարաբերությունների մասով: 

Քրիստինե Աղաբեկյան

MediaLab.am

The post Տհաճ տեսարան է, երբ քաղաքական ուժերը փորձում են հոգևոր հայրերին ներքաշել քաղաքական խաղերի մեջ. Աննա Կոստանյան first appeared on MediaLab Newsroom-Laboratory.