Махачев мотивация йўқолгандан кейин вазн тоифасини алмаштирди

Россиялик UFC жангчиси Ислом Махачевнинг менежери Ризван Магомедов спортчининг яқинда қабул қилган муҳим қарорини очиқлади. Унга кўра, Махачев енгил вазн (70 кг) тоифасидаги чемпионлик камаридан воз кечиб, янги синов — ярим ўрта вазн (77 кг) дивизионига ўтишни маъқул кўрган.

Менежернинг таъкидлашича, бу қарор жангчи учун оғир бўлмаган. “Бу қарор унга умуман қийин бўлмади, чунки у бу ҳақда анча вақтдан бери ўйлаб юрарди. Бир куни Ислом менга ‘мотивацияни йўқотаяпман, камарни ҳимоя қилиш энди оддий ишга айланмоқда’, деди. У ҳатто тайёргарликка жиддий ёндоша олмасликдан қўрқарди. Шу сабабли янги тоифага ўтиш орқали ўша ички оловни қайта топди,” — деди Магомедов.

Менежернинг сўзларига кўра, Махачев янги вазнда ҳам юксак натижалар кўрсатишга интилаяпти. “Ҳозир у бутунлай бошқача кайфиятда. Бу янги босқич унинг ичидаги рақобат руҳини қайта ёқди. Албатта, у бу қарорни олдиндан режалаштирганди, аммо Белал Муҳаммад чемпион бўлгани сабабли бироз иккиланаётган эди. Энди эса ҳамма нарса ўз ўрнига тушди,” — дея қўшимча қилди у.

Эслатиб ўтамиз, 16 ноябрь куни бўлиб ўтадиган “UFC 322” турнирида Ислом Махачев янги тоифадаги илк жангини ўтказади. Унинг рақиби — ярим ўрта вазн чемпиони, австралиялик Жек Делла Маддалена бўлади.

Бу тўқнашув нафақат Махачев учун янги вазндаги дебют, балки тарихий аҳамиятга эга бўлиши мумкин — у агар ғалаба қозонса, икки вазн тоифасида ҳам чемпионликни қўлга киритган UFC юлдузлари сафига қўшилади.

Шу билан Махачев ўзининг янги мақсади — янги дивизионда ҳам зўрликни исботлаш учун йўлга чиқди.