Туркияда ўзбекистонликлар гўшт майдалагич ичига яширилган 61 кг олтин билан ушланди
Туркияда ҳуқуқни муҳофаза қилиш органлари 5 нафар Ўзбекистон фуқаросини ноқонуний олтин олиб ўтишга урингани учун қўлга олди.
Маълум бўлишича, 3 нафар аёл ва 2 нафар эркакдан иборат гуруҳ Ўзбекистондан Истанбул орқали Каппадокия минтақасидаги Невшехир аэропортига парвоз қилган. Уларнинг багажлари текширилганда 61 килограмм 121 грамм олтин топилган.
Тергов жараёнида аниқланишича, олтинлар гўшт майдалагичлар ва миксерлар ичига эҳтиёт қисмлар кўринишида эритилиб жойлаштирилган. Мутахассислар бу усул юқори даражада тайёрланган контрабанда схемасини эслатганини қайд этмоқда.
Невшехир вилояти полициясининг контрабанда ва уюшган жиноятчиликка қарши кураш бўлими гумондорлар ҳақида аввалдан маълумотга эга бўлган. Шу сабабли улар аэропортга етиб келиши биланоқ махсус рейд ўтказилган.
Полиция ходимлари, шунингдек, аэропортда уларни кутиб олгани айтилаётган яна бир шахсни ҳам қўлга олди. Ҳозирда барча гумондорлар суд органларига топширилган, топилган олтинлар эса мусодара қилинган.
Расмийларга кўра, бу Туркияда сўнгги ойлар ичида аниқланган энг йирик олтин контрабандаси ҳолатларидан бири ҳисобланади.