Ашраф Ҳакимига операция керак эмас
ПСЖ футболчиси Ашраф Ҳакими учун Чемпионлар лигаси доирасидаги "Бавария"га қарши учрашув биринчи бўлим охирида якунланди. Марокашлик ҳимоячи Луис Диаснинг қўпол ҳаракати натижасида тўпиқдан жароҳат олиб, майдондан кўз ёшлар билан чиқиб кетди.
У стадионни қўлтиқтаяқ ёрдамида тарк этди. Marca нашрининг хабар беришича, Ҳакими чоршанба куни тиббий кўрикдан ўтган ва унга синдесмознинг ёрилиши ҳамда делтоид боғламнинг енгил шикастланиши ташхиси қўйилган.
Стадионда шифокорлар жароҳатни синиқ деб гумон қилишган эди, лекин бахтга кўра, жароҳат ўта жиддий бўлиб чиқмади ва Ҳакимига операция талаб этилмайди. Шунга қарамай, ПСЖ футболчиси тўлиқ тикланиш учун тахминан икки ой вақт талаб қилади.
Бу эса Ҳакимининг 21 декабрда бошланадиган Африка Миллатлар Кубогида иштирок этишини хавф остига қўяди.