«Барселона» Левандовскидан гол урмасликни сўраган

Полшалик журналист Себастян Сташевский ёзган янги китобда келтирилишича, «Барселона» 2022/23 йилги мавсум охирида Роберт Левандовскидан гол уришни вақтинча тўхтатишни сўраган бўлиши мумкин. Бунга сабаб — агар ҳужумчи 25 тадан ортиқ гол урса, клуб «Бавария»га 2,5 миллион евро(тахминан 2,7 миллион доллар) бонус тўлаши кераклиги билан изоҳланган.

Маълумотларга кўра, Ла Лига чемпионлиги қўлга киритилгач, Левандовский машғулотдан кейин раҳбарият иштирокидаги учрашувга чақирилган. У ерда футболчига охирги ўйинларда гол уришни чеклаш бўйича кутилмаган таклиф билдирилган.

Сташевскийнинг таъкидлашича, Левандовский профессионал фаолиятида биринчи марта бундай илтимосни эшитган ва бунга ҳайрон бўлган. Клуб эса бу чорани молиявий вазият билан боғлагани айтилади.

Натижада, ҳужумчи сўнгги икки турда гол ура олмади ва мавсумни 23 та гол билан якунлади. Китобга кўра, шу орқали «Барселона» бонус тўлашдан қочиб қолган.