Лапорта Флик билан суҳбат ҳақида гапирди

Барселона президенти Жоан Лапорта Чемпионлар лигаси доирасида "Челси"га қарши ўйинда (0:3) мағлубиятдан кейин бош мураббий Ханс-Дитер Флик билан бўлган суҳбат ҳақида сўзлаб берди. Учрашув сешанба куни Лондонда, гуруҳ босқичининг бешинчи турида бўлиб ўтган эди.

"Мен Лондондан қайтишда Флик билан суҳбатлашдим. Ҳанси ва бутун жамоанинг реакцияси менга жуда ёқди – ҳамма бирлашганлиги сезилади.

Мураббий оптимистик кайфиятда ва мен ушбу ўйин биз учун бурилиш нуқтаси бўлишига ишонадиганларданман", – деди Лапорта испан оммавий ахборот воситаларига. Шанба куни "Барселона" Ла Лига 14-турида ўз майдонида "Алавес"ни қабул қилади.