Вильярреал сўнгги дақиқаларда ғалаба қозонди

Испания чемпионатининг 14-турида "Реал Соседад" ва "Вильярреал" жамоалари ўзаро баҳс олиб борди. Учрашувда мезбонлар "Реал Соседад" 2:3 ҳисобида мағлубиятга учради.

"Вильярреал" сафарда Айосе Перес ва Альберто Молейронинг голлари эвазига 2:0 ҳисобига олдинга чиқиб олган эди. "Реал Соседад" сафида 60-дақиқада Карлос Солер ҳисобни қисқартирди.

77-дақиқада россиялик ярим ҳимоячи Арсен Захарян майдонга тушди. Ўйиннинг 87-дақиқасида Андер Барренечеа "Реал Соседад"нинг иккинчи голини уриб, ҳисобни тенглаштирди.

Аммо "Вильярреал" ўйин якунида Альберто Молейронинг дубли орқали ғалабани қўлга киритди. Якуний ҳисоб – 2:3.

Бу "Вильярреал"нинг кетма-кет бешинчи ғалабаси бўлди ва улар очколар бўйича "Реал Мадрид"ни қувиб етди. Аммо мадридликлар ҳали ўз учрашувини ўтказганича йўқ.