Астон Вилла АПЛдаги сўнгги 12 ўйиннинг 11 тасида ғалаба қозонди

Астон Вилла ҳозир жуда яхши спорт формасида. Якшанба куни Унаи Эмери шогирдлари Англия Премьер-лигаси доирасида ўз майдонида Манчестер Юнайтедни 2:1 ҳисобида мағлуб этди.

Натижада бирмингемликларнинг барча турнирлардаги ғалабали серияси 10 ўйинга етди. Премьер-лига кесимида қаралганда, Астон Вилла сўнгги 12 учрашувнинг 11 тасида зафар қучди.

Шунингдек, жамоа барча мусобақаларда кетма-кет 10 та уй учрашувида ғалаба қозонган. Астон Вилла ўз майдонида охирги бор 31-август куни, Кристал Пэласга 0:3 ҳисобида ютқазган баҳсда очколарсиз қолган эди.

Астон Вилла Премьер-лига турнир жадвалида учинчи ўринни эгаллаб турибди. Унаи Эмери жамоаси пешқадам Арсеналдан бор-йўғи уч очкога ортда қолмоқда.