АҚШ санкциялари Эрон гиламларига зарба берди

Financial Times хабарига кўра, АҚШ санкциялари ва Эрон ичидаги валюта чекловлари туфайли Эрон гиламларининг экспорти кескин қисқарган. Прогнозларга кўра, 2026-йил мартига келиб, экспорт ҳажми 40 миллион доллардан ҳам камроқ бўлиши мумкин.

Бу эса, 30 йил аввалги 2 миллиард доллардан ошиқ кўрсаткич билан солиштирганда, жуда катта пасайишни англатади. Вашингтон 2018-йилда Эроннинг ядро келишуви туфайли санкцияларни кучайтирган эди.

Хусусан, АҚШ савдо ва молиявий эмбарголар, нефть экспортига чекловлар, банкларнинг халқаро ҳисоб-китобларга киришига тўсқинлик қилувчи чораларни жорий этган. Банк соҳасидаги чекловлар ҳам экспортчиларга зарба берди, чунки Теҳрон уларни валюта даромадининг бир қисмини сотишга мажбур қилмоқда.

Экспортдаги пасайиш ишлаб чиқаришга ҳам салбий таъсир кўрсатди. Соҳавий ташкилотлар маълумотларига кўра, гилам тўқувчилар сони 1990-йиллардаги 6 миллиондан бугунги кунда 700 мингдан ҳам камроқ даражага тушиб кетган.

Гилам ишлаб чиқариш ҳажми эса йилига 6 миллион квадрат метрдан 2 миллион квадрат метрдан камроқ даражага пасайди. Бундан ташқари, Эрон йилдан-йилга ўтказиб келган гилам кўргазмасини ҳам бекор қилди.

Financial Timesнинг ёзишича, бунга асосий сабаб электр энергияси билан боғлиқ муаммолар бўлган. Вазиятни яхшилаш мақсадида Теҳрон экспортчиларга қўйилган талабларни юмшатиш ва гиламчилик соҳасини қўллаб-қувватлаш учун махсус гуруҳлар ташкил қилишни режалаштирмоқда.