Фернандо Торрес Слот учун ҳаммасини исботлаш вақти келди

«Ливерпул»нинг собиқ ҳужумчиси Фернандо Торрес жамоанинг ҳозирги бош мураббийи Арне Слот фаолияти ҳақида фикр билдирди. Бу ҳақда euro-football.ru хабар беради.

Голландиялик мутахассис Англиядаги илк мавсумидаёқ «қизиллар»ни Премьер-лига чемпионлигига олиб чиққанди. Бироқ жорий мавсумда натижалар у қадар барқарор эмас: мерсисайдликлар турнир жадвалида 4-ўринда бормоқда ва пешқадам «Арсенал»дан 10 очко ортда қолган.

«Менимча, Слот учун «Ливерпул»га мос инсон эканини исботлаш вақти келди. Ўтган мавсум ажойиб ўтди, у Премьер-лигани ютди — бу исталган мураббий учун жуда қийин вазифа. Слот биринчи мавсумдаёқ муваффақиятга эришди, демак, ғалаба учун нима кераклигини билади. Энди эса қийинчиликлар бошланган паллада у вазиятни ўзгартира олишини кўрсатиши керак. Умид қиламанки, бунга эришади», — Торреснинг сўзларини Anything Liverpool келтирди.

1-январ, пайшанба куни «Ливерпул» ўз майдонида «Лидс»ни қабул қилади.