Стич феномени: Disney маҳсулотлари 4 миллиард доллар даромад келтирди

Disney компанияси 2025 молиявий йили якунларига кўра, Стич қаҳрамони акс этган турли лицензияли маҳсулотлар савдосидан 4 миллиард доллардан ортиқ даромад олди. Бу ҳақда DTF нашри хабар бермоқда.

Маълумотларга кўра, Стичга бўлган қизиқишнинг кескин ўсиши «Лило ва Стич» ремейкининг катта тижорий муваффақияти билан бевосита боғлиқ. Фильм жаҳон прокатида 1,04 миллиард доллар йиғиб, йилнинг энг даромадли лойиҳаларидан бирига айланди. Компания бош директори Боб Айгер таъкидлашича, ушбу картина Disney+ платформасида оригинал анимацион фильмга ҳам қизиқишни сезиларли даражада оширган.

Айгернинг сўзларига кўра, мерчандайзинг бугунги кунда фақат савдо воситаси эмас, балки контент, мухлислар ҳиссиёти ва Disney’нинг тематик паркларида яратилган таассуротларни бир-бирига боғлаб турадиган муҳим экотизим қисми ҳисобланади.

Шу жараён фонида Стич Disney’нинг маркетинг кампаниялари ва ижтимоий лойиҳаларида ҳам тобора кўпроқ кўзга ташланмоқда. Жумладан, 2025 йилда у илк бор Disney Holiday Magic Tour хайрия турида Микки Маус ўрнини эгаллади. Ушбу йиллик ташаббус доирасида компания хайрия маблағлари йиғиб, болаларга совғалар тарқатади ва мухлислар учун турли тадбирлар ўтказади.

Бундан ташқари, декабр ойи бошида Стич Бродвей саҳнасида ҳам илк бор пайдо бўлди. «Аладдин» мюзикли намойиши якунида у саҳнага чиқиб, “A Whole New World” қўшиғини ижро этди ҳамда томошабинларни Toys for Tots жамғармаси учун ўйинчоқлар эҳсон қилишга ундади.

Шу тариқа, Стич нафақат экранда, балки тижорат ва ижтимоий майдонда ҳам Disney’нинг энг қимматли брендларидан бирига айланиб бормоқда.