«Ливерпуль» «Реал» юлдузи Беллингем учун 180 млн евро таклиф қилиши мумкин

Жуд Беллингемнинг «Реал»дан кетиши ҳақидаги гап-сўзлар ҳозирча кўпроқ «сариқ» миш-мишларга ўхшайди, бироқ футболда кутилмаган бурилишлар ҳам бўлиб туради. Бир неча кун аввал инглиз ярим ҳимоячиси учун «Челси» даъвогарлардан бири экани тилга олинганди. Энди эса «қаймоқранглилар» етакчиси яна бир АПЛ гранди билан боғланмоқда. Бу ҳақда euro-football.ru хабар беради.

Инсайдер журналист Экрем Конур ижтимоий тармоқларда «Ливерпуль» Беллингемни қўлга киритиш учун 180 миллион евро сарфлашга тайёрлигини ёзди. Агар бундай келишув амалга ошса, мерсисайдликлар трансфер бозорини жиддий ларзага келтириши мумкин.

22 ёшли Жуд Беллингем 2023 йил ёзидан бери «Реал» шарафини ҳимоя қилиб келмоқда. Англиялик футболчининг Мадрид клуби билан амалдаги шартномаси 2028/2029 йилги мавсум охиригача мўлжалланган.