Հայաստան-Ադրբեջան խաղաղության համաձայնագիրը արժանացել է 2026 թվականի Զայեդի մրցանակին. Vatican news
Մարդկային եղբայրության Զայեդի մրցանակի 2026 թվականի դափնեկիրները հունվարի 19-ին հայտարարվել են։ Պաշտոնական հաղորդագրության համաձայն՝ մրցանակաբաշխության հանդիսավոր արարողությունը կկայանա փետրվարի 4-ին՝ Մարդկային եղբայրության միջազգային օրը, Աբու Դաբիում՝ Հիմնադրի հուշահամալիրում։Այս մասին հայտնում է Վատիկան նյուզը:
Դափնեկիրների թվում են Հայաստանի Հանրապետության և Ադրբեջանի Հանրապետության պատվիրակությունները, որոնք 2025 թվականի օգոստոսի 8-ին ԱՄՆ-ում ստորագրել են երկու երկրների միջև պատմական խաղաղության համաձայնագիրը, ինչպես նաև Զարգա Յաֆթալին՝ Աֆղանստանում աղջիկների կրթության երկարամյա պաշտպան։
Սա առաջին դեպքն է, երբ միջազգային հանձնաժողովը մրցանակի է արժանացնում Կովկասից և Աֆղանստանից ներկայացուցիչների։
Հայտարարության մեջ նշվում է, որ Կովկասի երկու երկրների միջև խաղաղության համաձայնագրի արժանացումը մրցանակի հանդիսանում է երկու պետությունների կողմից իրականացված «խաղաղության, երկխոսության, հարաբերությունների կարգավորման և հակամարտությունների լուծման գործընթացի» համար, ինչպես նաև ընդգծում է, որ հաշտեցումը «միանգամյա գործողություն չէ, այլ շարունակական ճանապարհ»։
Համաձայնագիրը բնութագրվում է որպես «հեռատես ղեկավարությամբ առաջնորդված պատմական որոշման արդյունք», որի նպատակն է վերջ դնել Կովկասում տասնամյակներ շարունակվող հակամարտություններին և հումանիտար տառապանքներին։
ՀՀ վարչապետ Նիկոլ Փաշինյանը մրցանակը գնահատել է որպես «մեծ պատիվ», որը ճանաչում է «այս պատմական համաձայնագրի» իրականացմանն ուղղված ջանքերը։
Ադրբեջանի նախագահ Իլհամ Ալիևը ևս ընդգծել է մրցանակի կարևորությունը՝ նշելով, որ այն կրում է Արաբական Միացյալ Էմիրությունների հիմնադիր Շեյխ Զայեդ բին Սուլթան Ալ Նահյանի անունը և աջակցվում է Հռոմի պապ Լեո XIV-ի և Ալ-Ազհարի մեծ իմամ Ահմեդ Ալ-Թայեբի կողմից։
The post Հայաստան-Ադրբեջան խաղաղության համաձայնագիրը արժանացել է 2026 թվականի Զայեդի մրցանակին. Vatican news first appeared on MediaLab Newsroom-Laboratory.