Тошкентда бегона хонадонларга бостириб киришга уринган эркак қамалди

Юнусобод туман судида 30 ёшли маҳаллий фуқаро бегона хонадонларга киришга урингани учун 10 суткага маъмурий қамоқ жазосига ҳукм қилинди. У 19 январга ўтар кечаси кучли маст ҳолатда 11-мавзе аҳолисининг эшикларини тепиб-уриб, илгакларидан узишга ва эшик тутқичларини суғуриб олишга ҳаракат қилгани айтилади. Бу ҳақда podrobno.uz хабар беради.

Ҳодиса ярим тунднан кейин Юнусобод туманидаги кўп қаватли уйлардан бирида бошланган. Иш материалларига кўра, у аввал бир хонадон эшигини куч билан очмоқчи бўлган, орадан бир неча дақиқа ўтиб эса қўшни уйга ўтган. Шовқиндан чўчиган аҳоли ҳуқуқ-тартибот идораларига қўнғироқ қилишини айтгач, у жойидан қочиб кетган. Бироқ кўп ўтмай шахси аниқланиб, ички ишлар ходимлари томонидан ушланган.

Суд мажлисида эркак айбини тўлиқ тан олган. У қилмишини спиртли ичимлик таъсиридан "хотира узилишлари" бўлгани ва оилавий муаммолар билан изоҳлаган, пушаймонлигини билдирган ҳамда энг енгил жазо беришни сўраган.

Ҳолат Маъмурий жавобгарлик тўғрисидаги кодекснинг 183-моддаси (майда безорилик) билан баҳоланиб, унга 10 суткалик маъмурий қамоқ тайинланди.