Ўзбекистонда болаларга нисбатан жинсий жиноятлар учун умрбод қамоқ жорий этилиши мумкин

Ўзбекистонда вояга етмаганларга, хусусан 14 ёшга тўлмаган болаларга нисбатан содир этилган жинсий характердаги жиноятлар учун жиноий жавобгарликни кескин кучайтириш режалаштирилмоқда. Таклифлар орасида энг оғир жазо чораси — умрбод озодликдан маҳрум этиш ҳам бор. Бу ҳақда uzdaily.uz хабар беради.

Бу нормалар “Ўзбекистон — 2030” стратегиясини амалга ошириш дастури лойиҳасига киритилган бўлиб, ҳозирда ҳужжат жамоатчилик муҳокамасига қўйилган. Лойиҳага кўра, 14 ёшга етмаган шахсларнинг жинсий дахлсизлигига қарши жиноятлар учун умрбод қамоқ жазоси белгилаш таклиф этилмоқда.

Шунингдек, болаларга нисбатан жинсий ва бошқа турдаги зўравонлик ҳолатлари бўйича жиноят ишларини тергов қилиш тўлиқ прокуратура ваколатига ўтказилиши кўзда тутилган.

Аёллар ва болаларга нисбатан зўравонлик ҳамда босим билан боғлиқ ишларни самарали тергов қилиш ва судда кўриб чиқишни кучайтириш мақсадида махсус тайёргарликка эга терговчилар ва судьялардан иборат ихтисослашган корпус шакллантириш режалаштирилмоқда. Ташаббус муаллифлари бу чора-тадбирлар энг ҳимоясиз қатламларни ҳимоя қилиш тизимини мустаҳкамлаш ва жинсий жиноятларга қарши кураш самарадорлигини оширишга қаратилганини таъкидламоқда.